The Government of the Grand Duchy of Luxembourg

Fräiwëlleg abezuelen (ouni Arbechtskontrakt) an wéini Pensioun?

Fräiwëlleg abezuelen (ouni Arbechtskontrakt) an wéini Pensioun?

Moien,

ech wëll den 15/1/2031 ophalen mat schaffen. Bis dohinner hun ech 400 Méint geschafft an abezuelt (période d'assurance).

Ech wollt dann nach 16 Méint fräiwëlleg aus menger Täsch an d'Pensiounskeess abezuelen, ech kéim dann den 15/5/2032 op 400+16=416 Méint période d'assurance.

Vun de Studien hier hun ech 72 Méint période complémentaire.

Wann ech dann 60 Joër kréien (15/8/2033) hätt ech esou 416 + 72 = 488 Méint.

Meng Froën:

a) dierf ech fräiwëlleg (ouni schaffen ze goën) abezuelen an zielen déi 16 Méint als "période d'assurance"? (ech hu genuch gespuert fir all Mount mäi Bäitrag können an d'Pensiounskeess anzebezuelen)

b) kréien ech dann mat 60 Joër (15/8/2033) meng Pensioun oder kréien ech déi réicht mat 60 Joër plus 8 Méint (also dann den 15/4/2034)?

Merci villmols!

Answer

Merci fir Är Fro. 

Falls Dir am Joer 2031 ophale wëllt mat schaffen, kënnt Dir Iech fräiwëlleg beim Centre commun de la sécurité sociale (CCSS) affiliéieren, fir weiderhi fir d’Pensioun ze cotiséieren. Déi dräi Joer, an deenen Dir esou cotiséiert, ginn an d'Berechnung vun Ärer Pensioun berécksiichtegt. 

Dir kritt Är 60 Joer no 2030 an dir hutt eng Versécherungscarrière déi net nëmmen aus 480 Méint obligatoresch Cotisatiounsperiode besteet mee och aus Ergänzungszäiten wou dir net abezuelt hutt (z.B. Studiejoren). Doduerch musst dir nach 8 Méint méi laang cotiséieren an dir kritt Är virgezunne Pensioun da mat 60 Joer an 8 Méint. Dës 8 Méint mussen aus obligatoreschen Zäiten oder fräiwëllege Periode bestoen an no dem Datum erreecht ginn, op deem déi ugeschwate 480 Versécherungsméint erfëllt sinn.

Et ass ze preziséieren datt d’Zuel vun de Méint vun den Ergänzungszäiten (d’Zuel vun de Studieméint) dozou déngen, den Ënnerscheed tëscht 480 Méint an dem Rescht vun Ärer Versécherungskarriär auszegläichen. 

Dir kënnt ab 55 Joer eng Estimatioun fir Är Pensioun bei der CNAP ufroen. 

W.e.g. bemierkt, datt dës Äntwert op der aktueller Legislatioun baséiert an nëmmen eng Estimatioun vun Ärer Situatioun ass, baséiert op den Informatiounen, déi Dir uginn hutt. Nëmmen de déi kompetent Pensiounskeess kann Iech präzis Informatiounen iwwer Är Situatioun ginn.